Sətirlərin maviliyində

X

Sətirlərin maviliyində

Sətirlərin maviliyində

ərəstu mücərrəd

	düşür və sınır
قیرمیزی داش دالغالار ، قوپور بیر بیریندن یووارلاناراق داغیلیرلار یئره دوغرو . وولکان ، وولکان آرخاسینجا قاسیرغا باسیر قارلی اورمانلاری و شه هرلری ماشینلارین ، پارک لاردا اوشاقلارین قیشقیریغی و فابریکالارین سسی باسیر . دمیرچی آغیر چکیش له دؤیور اودلو دمیری . شارلار پارتلاییر قارا گؤی لرده . شامپانی لرین کؤپویو قانا بولاشیر. اوتوراجاقلار چئوریم دوشورلر ! کارلورف- ون دئپرئم سالان سمفونیاسی دیر . گؤیه واریرام ! سیرا – سیرا تپیک سسلری گلیر هاوادان و بولودلار لای لای اؤتور قالدیریملاردان سیزان قان گؤلوندن . گؤی ده منم و گؤی ده بیرده مندن گؤیرن تئللی دیر ! ائولری وار آی آمان خانا خانا عاشیق اولدوم آی آمان ، آی آمان یانا یانا ! آز سونرا بير بيريميزه اوخشاياجاييق جومجومه لريميز عئيني سوموكلريميز عئيني او " اؤلدورمه سن اؤلدوررلر " سؤزونه هئچ اینانمیردی ، اوچورتما کیمی هر نه یین هاوایا قالخاجاغینی دوشونوردو ، اله سالیردی سرت دانیشان قونشوسونو : سن ائله بیلیرسن کی وارلیق سنینله بیر آندا یارانیب ، و سایسیز سامان یولو اولدوزلارینی سندن اؤترو سپیبلر گؤی بویونجا ، آنجاق بیلمیرسن کی یئری گلسه بیر جویور دریسینی سندن آرتیق سئوه بیلر او گؤرونمه ین " ! والیبال اویناردی و گئجه لر شه هری قاچاردی ، بیر مکتوبو گیزلیجه اوخویاردی داییما هردن گورردیم ، نه قه در کؤکسو اوستونده کیتابلا یوخویا گئتمیشدی ، اردبیل لی بیر دوستوایلا آزی یوز یول ساوالانی آشدیلار ، بوتون یوموشاقلیغیلا دمیره دؤنموشدو و چیینلرینده قایا دوراردی من سانیردیم ، الینین ایچی کیمی تانیردی اؤلکه نین بوتون داغ داشینی ، بیر گون قاباقلارینا آیی چیخدیغینی همیشه قورخا قورخا و شیرین شیرین دانیشاردی توکوموز بیز بیز دوراردی ، سونرا ائشیددیک کی اوو سیلاح لاری اولا – اولا آیی یا آتش آچماییب لار . هاوا توتغوندور ، اردبیلین سویوقلوغو کوچه – کوچه کئچیر مندن ، یادیما چوخ شئی دوشور ، دوشور و سینیر ایچیمده ، یئددی گؤز کؤرپو ، آلاقاپی ، ... ، اوره ییمی قالخیزیر کئف سیز قارقالارین آلچاق اوچوشو "آقا – آقا . – آقا منه بیر ساندویچ آلیرسان ، دونندن آجام ! نه اولار بیر دنه ، پولون ایسته میرم ، اؤزون آل وئر یئییم . نه اولار آقا ، آقا بیر ساندویچ ... " بونو دانیشارکن اوشاق کیمی بوزولردی دوداقلاری ! بیر سون باهار قیرمیزی اوزاقلاردا ، دئوریلمیشکن سیلاحین دولو تاپدیلار الینده
+ یازیلمیش دیر دوشنبه 9 آذر1388ساعات 9 قبل از ظهر ə . m \|

	yağışın səhəri
ياغيشين سحري سئرچه لر بیزدن قورخوردولار ، اونلاردان قورخموردولار ایت لر بیزدن قورخوردولار ، اونلاردان قورخموردولار ، پیشیک لر بیزدن قورخوردولار، اونلاردان قورخموردولار ، اینسانلار بیزدن قورخوردولار، اونلاردان ... ! من سئومه یه گؤره آدام اولمالیدیم ، و سئومه میشدن قاباق خیردا آدیمی گئجه کانسئرت لرینده باغیراراق گنج وندالیست لر اسپری له داما دووارا یازمالیدیـــلار . Ⅶ آردی ---->
+ یازیلمیش دیر یکشنبه 24 آبان1388ساعات 4 بعد از ظهر ə . m \|

	Mən ölümü
Əhməd şamlu Çevirən : ərəstu mücərrəd « من ، اؤلومو ... » بو آن زامانین آغیر کئچر دالغاسی دیر کی منده اؤتور . بو آن زامانین آغیر کئچر دالغاسی دیر کی دمیر ایرماغی تک منده اؤتور . بو آن زامانین آغیر کئچر دالغاسی دیر کی داش و پولادلا دولو دنیز کیمی منده اؤتور . ایلیق یئللر کئچیدینده بیر باشقا ماهنی باشلادیم یاغمور کئچیدینده بیر باشقا ماهنی باشلادیم کؤلگه کئچیدینده بیر باشقا ماهنی باشلادیم Ⅶ آردی ---->
+ یازیلمیش دیر سه شنبه 19 آبان1388ساعات 6 بعد از ظهر ə . m \|

	Türkiyə ədəbiyatının təkmilləşmə axımı klasikdən bu günə kimi
تورکییه ادبیاتی نین تکمیللشمه آخیمی کلاسیک دن بو گونه کیمی چئویرن : ارسطو مجرد ایران ادبیات مرکزی نین ایکی یوز یئددینجی قورولتایی ، تورکیه ادبیاتی نین کلاسیک دن بو گونه کیمی بوتؤولشمه آخیمی نین آراشدیرماسینا آیریلمیش دیر . بو قورولتای دا خانیم دوکتور فرزانه دولت آبادی دانیشمیشلار . [بو دانیشیق اولدوغو کیمی چئوریلیب عزیز اوخوجولارا تقدیم اولونور ] دیل بشریت آراسیندا سس لر و سؤزجوکلر توپلوسوندان یارانان آنلام آراجی دیر و تاریخ بویو بوتون طبیعی عامیل لر کیمی اؤز بوتؤولشمه آخیمینا داوام ائله ییر . اینسان لار دیل آراجی ایله اؤز دویغولارین ، دوشونجه لرین گؤستریر ، گره کلرین یئرینه یئتیریرلر و باشقا هر بیر میراث کیمی اونو اوشاقلارینا و گله جه یه داشیندیریرلار . دیل بو اؤز آخیمیندا و داشینمالاریندا بوتؤولشیر و داهادا بوتؤولشیر . اسکی قابلارینی بوراخیر ، یئنی قابلار توتور . اورال – آلتایی دیل لریندن اولان تورک دیلی دونیانین ان تانینمیش قدیم و یاسالی دیل لریندن بیری دیر.تورک دیلی موتخصصیص لری، تورک دیل لی میللت لری اوچ بؤیوک دسته یه آییریرلار : Ⅶ آردی ---->
+ یازیلمیش دیر شنبه 9 آبان1388ساعات 1 بعد از ظهر ə . m \|

	Romən rolan
رومن رولان چئویرن : ارسطو مجرد 1915 – جی ایل ادبیات نوبئلینین اؤدولونو قازانمیش یازیچی فیرانسا یازیچی سی ، 1915 – جی ایل ادبیات نوبئلی موکافاتینین قالیبی ، تکجه 10 جیلدلیک" ژان کیریستوف" آدلی رمانین یارادیجیسی دئییل ، بلکه دونیا آدلیملاری او جومله دن : بتهوون ، تولئستوی ، گاندی ، هئـندل ، گوته و باشقالاری باره ده ده قالین بیوگرافی لر یازدی . اؤرنه یین اینجه صنعت چی لر حیاتی و باتی موسیقی تاریخی نی احاطه ائدن بتهووئن حاققیندا یازدیغی بیوگرافی کیتاب 7 جیلد دیر. رولان بوندان باشقا شئکسپیر ، روبسپیر و دانتون عونوانلی درام لاردا یازمیش دیر . گؤره سن رولانین ایددعا ائتدیی کیمی بیوگرافی یازماقدان مقصدی آیدینلاشدیرماق ، اخلاق اوصوللارینی و اینسان سئورلییی تبلیغ ائتمک ایدی ؟ اؤزو دئمیشکن او ایسته ییردی اینجه صنعت چی لری و دونیا شؤهرتلی اینسان سئورلری تانیتدیرماقلا عدالت سیز توپلوملاردا اینسان آزادلیغینین ازیلمه سینه مانع اولسون و آوروپانی دوشونجه و کولتور و ائله جه ده اخلاقی زاوالدان نیجات وئرمک اوچون چالیشدی قاباریق دوشونورلرقاتیینی تانیتدیرما یاردیمیلا اوخوجولار آراسیندا اخلاقی چئوریلیشه ال ویرسین و آوروپادا یئنی مدنیت دوغونوشونا سبب اولسون . او آیدینجا دئییردی کی سوسیالیستی نیظاملارا ماراغی سیاسی ، ایقتیصادی اوغورلار دئییل یالنیز اینسان اخلاقینین اومیدلرینه گؤره دیر . او اثرلرینین مقصدینی تخییول و فوندامئنتالیزم یوخ بلکه یاشاییشه اومید بسله مک سانیردی . Ⅶ آردی ---->
+ یازیلمیش دیر پنجشنبه 30 مهر1388ساعات 11 قبل از ظهر ə . m \|

	Tanınmaz
قاباقلار بیر نئچه یول اونو شه هر دن کنار تارلالار آراسیندان اؤتنده قولو چیرمانیقلی الینده ایینه و داماغیندا کئفله چکدییی سیگاری گؤرموشدوم . بیر یئر وار اوتورماق اولور ، اورادا اوتورموشدو ، او کیمدن آیریلمیشدی و کیمه دایانمیشدی ، کیمه یانیردی ، نییه یانیردی من بیلمیرم کیمدن آیریلمیشدی بیلمیرم ،کیمه بورجلوایدی و کیمه دایانمیشدی و کیمه باغلی ایدی و کیمه یانیردی و کیمه سؤنوردو آنلامیرام ؛ آنجاق سیتم آخان باخیش لاریندا قورخولو گئجه کئچیریب قورخولو گئجه کئچیره جه ییندن آن با آن ازیلیردی و قورخو داغ داغ آغیرلاییردی چیینلرینده ! او هانسی یازیلمامیش یاسانین و یازیلمیش سیتمین قوربانلیغیدی . هله آغیر بیر آد گزدیریردی اته یینده ، و بو او داغلارداندا آغیرایدی . رنگلی رنگسیز اینسانلار بو بیری گؤزوندن کئچیب او بیری گؤزوندن چیخیردیلار بیر – بیر . شه هه رین شام آغاجلاری تیتره ییردیلر بیلمیرم عادی کولک اسیمین دن یوخسا قیشین آمان سیز سویوغوندانمی ، من بیلمیرم او کیمه بورجلو ایدی کیمدن آیریلمیشدی و هانسی یارانمیش یوخسا یارانمامیش قیریمیزی ، قارا یاخود آغ بیر اینسانین الینه دوشموشدو قیزلیغی ! گؤزو سوزولموشدو بیر نوقطه یه ، و من اونو و او اؤزونو یئددی سکگیز یاشیندا ماوی گئیینمیش آغ چکمه لی ساچیندا چیچک چیینینده رنگلی میدادلاری ، ناغیل و مکتب کیتابلاریلا دولموش کیفی و الینده سو قومقوماسی ، بالاجا آیاقلاریلا یئن یئرییب مکتبه تله سیردی ، گؤوردوم و گؤروردو ! ... لیی شالواریندان ماوی لیک سورتولوب اوزولموشدو و قهوه یی مانتوسوندا بوکولموشدو شافاق لیغی ، بونو آمما داها دوز گؤردوم و قارشیسیندا ارییدی بوز وورموش اوزون بویوم و بوینوم سینماق ایسته ییردی باشیما دامجی لایان داملا داملا کیرینین آلتیندا . دیل آچمیش دی آیاغی آلتیندا پارتلاقلار و دوداقلارینین سولموشلوغونو نازیک بیر روژ لایه سی اؤرتموشدو ؛ اؤسکوروردو هردن و دوز بو آن داغیلیردی کؤکسو آلتیندا یغییشان کیمسه سیزلیک باکتری لری هاوایا و من اوزاقدان اوزاغا اییرنیردیم هاوادان ...
+ یازیلمیش دیر شنبه 25 مهر1388ساعات 12 بعد از ظهر ə . m \|

	Nə deyim
وار اولان اوره یی دمیر جرثقیل لردیر! قیش یوخوسوندا یوغون شه هه ر . و چوخداندیر تانیش پالتارلاری تراس دا گؤرمورم. فیریشته لر نئجه ده چیرکینمیشلر ؛ ماریا! سنه ناغیل نه دئییم خئيرين گئجه يه قالماسين سول اول !
+ یازیلمیش دیر دوشنبه 20 مهر1388ساعات 6 قبل از ظهر ə . m \|