ادامه

سونرا " تا نفس" واریدی "قورو جیسمیم ده فریاد " ائله ییردیم! وسوسه اولوردوم، منی گؤرونمز بیر گوج ،خطره دوغرو چکیردی، قلم گؤتورمه یه ! «جسارت»! ائدیب غزل یازماق ایسته ییردیم و ایسته ییردیم کی من ده " پنبه ی داغ جنون ایچره "  نهان اولوم...

بیر نئچه ایل غزل یازدیم. لووغالیق اولماسایدی دییردیم کی یازدیغیم غزل لر ادبی محفیل لرده چوخدا پیس قارشیلانمیردی ! و من گون اولوردوکی غزل ژانریندا بیر نئچه شعر یازماغا موفق اولوردوم مثلا بو مطلع لی غزل لر کیمی: گتیر ساقی شراب و می کی لاجرعه چکیم باشه/ اولوم مستی مئیی باقی ووروم باشی داغا داشه... ساقی لر تا گوردولر سن تک گوزو مستا نه نی / ییغدیلار بند و بساطی اؤرتدولر میخانه نی... سن گلن واختی بوتون حلّ اولونور مشکل لر / ساغالیر دردلی اوره کلر قورولور محفیل لر... و ... . اؤز ظنّیمجه بو ادبی حیاتیمین ایلکین اولاراق قیزغین و بیر چوخونون ( کلاسیک هوسکارلارین) فیکریجه "زنگین" چاغلاریم ایدی!! بئله لیکله یوزدن آرتیق غزل و بیر نئچه قوشما وحتی ایکی اوچ مسدّس ، مخمّس قالیبینده ده " شعر" یازدیم !.

سونرالار حیاتیمیز یئنی بیر مرحله یه  قدم قویدو ( سرحد لرین پوزولماسیلا علاقه دار ) بؤیوک شاعیر فضولی ایله یاناشی ،سید عظیم شیروانی ،علی آقا واحید، سلیمان رستم ،بختیار واهاب زاده ، صمد وورغون  و بیر نئچه باشقا غزل اوستاد لاری نین دا «سؤز شربتین دن» نوش ائدیردیم! او زامانلار دئییلن لره گؤره "شعر" عالمینده " موفق " ایدیم! آمما، زمانه میزین ائولادی اولماق اوچون بو اسکی و بیر چوخ تیکرار ، ردیف قافیه لی دوشونجه منی اصلا قانع ائده بیلمیردی! بو جهت منده ، منه " یئنی دالغا" یا قوشولماغی ان ضروری بیر حرکت کیمی دایما وورغولاییردی. قارشیمدا یئنی پنجره لرآچیلمالیدی. بئله لیکله 70- جی اون ایل لیین اورتا ایللرین ده چاغداش و یئنی ادبیاتلا تانیش اولماغا باشلادیم. بو آخیمین قاباریق نماینده لری ناظیم حکمت، احمد شاملو ، پابلو نرودا، فروغ فرخ زاد، فدریکو لورکا، اورحان ولی وباشقا موعاصیرشاعیر و یازیچی لارینین زنگین،اینجه، درین ، گئنیش و فرقلی دوشونجه و یارادیجیلیقلارینی ذره- ذره دویوب هر شئیه یئنی دن باخماغا مجبور قالدیم ! ایناندیم کی "منده مجنون دان فزون عاشیق لیگ استعدادی" یوخدور ! آنجاق تاریخه قوشولموش فضولی کیمی بیر حکیم دئیه بیلر کی: دیری اولدوقجا لیباسیم بودور اولسم کفنیم!! داها بو دوشونجه لر و دویغولار ایگیرمی بیرینجی قرینه نین باشلانیشیندا یاشایان اینسانی مجاب ائله یه بیلمزدی! بئله اولدوکی من غزل، مسدس ، مخمس، مستزاد، قوشما و باشقا قدیم شعر فرم لاریندا یازماغی بیر دفعه لیک کنارا قویدوم. نظامی، سعدی ،فضولی، مولوی تکجه بیزده دئییل بلکه دونیا سوییه سینده بؤیوک احتراما مالیک دیرلر .اونلارین مدنی- ادبی یارادیجیلیق لاری زامان- زامان بیر چوخ انسانلارین مدنی فرمالاشماسیندا بیر باشا رل اوینامیشدیر بونا هئچ بیر شوبهه یوخدور آمما اونلار هر نه ایدی اؤز زمانه لرینه باغلی لیق لاری واریدی و اثرلرین ده گتیردیک لری مؤوضوع لار ، اصطلاح لار ،باخیشلار، دیل ، عنصرلار وباشقا ایشلر یالنیز اؤز یاشادیقلاری دوره یه عایید ایدی. هامان ادبی آخیم کی اعتباراً کلاسیسمه داخیل دیر حال بو کی ایندی  مدرنیزم عصری دیر( هله پست مدرنیزم قالسین) اینسا نلارین آرزو و دغدغه لرینین هم ایچ (محتوا) و هم اوز(فرم) ماهیتی بوتونلوکله ده ییشمیش دیر. نظره آلماق لازیم دیر کی بشریت بلکه میلیونلار ایل یاشادیقی اسکی وتکرار حیات طرزینی داها آرخا دا قویموش دور . ایندی کی مدرن حیاتی تجربه ائله ین اینسانین دولاشیق(پیچیده) دونیا سی ایله او کئچمیش اینسانین ساده دونیاسی آراسیندا درین بیر اوچوروم یارانمیشدیر. گرچی بؤیوک عالیم فضولی نین  دیوانی الیم ده ن یئره قویولمور ، آنجاق اونو تکرار ائله مک حقی نی اؤزومه هئچ واخت قورویوب ساخلامیرام ! اوندا کی احمد شاملودان اؤیره ندیم ، " بیر بوداق /  مئشه نین قارانلیغیندا / ایشیغا دوغرو / باغیریر "من او بوداغین آرخا سینجا دوشدوم. بیلدیم کی داها هئچ واخت آرخایا یول یوخدور . بیر داها اینانج تاپدیم کی هونرین یئنی دونیاسینی زامانلا یاناشی یاراتماق لازیم دیر...

بونونلادا ، سؤزومو بؤیوک، خورخه لوییس بورخئسین سؤزو ایله قورتارماق ایسته ییره م: بوگونکو اولماق لازیم دیر، بو ساده حقیقته گوره کی ، بیز، حال حاضیر دا یاشا ییریق!"          7 /11/1384